વડાપ્રધાન નરેન્દ્ર મોદીએ ઉત્તર ભારતના રાજ્યોમાં ત્રીજા તબક્કાની ચૂંટણી પહેલા રવિવારે અયોધ્યામાં રામ મંદિરમાં રામ લલ્લાની મૂર્તિની પૂજા અર્ચના કરી હતી અને બે કિમી લાંબો રોડ-શો કર્યો હતો. મોદીના રોડ-શો પહેલા સમગ્ર અયોધ્યાને શણગારવામાં આવ્યું હતું. પીળી પાંખડીઓથી ‘ઓમ’ બનાવવામાં આવ્યું હતું. વિવિધ સ્થળોએ ફૂલોનો ઉપયોગ કરીને ધનુષ અને તીરની પ્રતિકૃતિઓ પણ બનાવવામાં આવી હતી. મોદી સાથે રોડ-શોમાં ઉત્તરપ્રદેશના મુખ્યપ્રધાન યોગી અને ભાજપના ફૈઝાબાદના ઉમેદવાર લલ્લુ સિંહ જોડાયા હતાં. અયોધ્યામાં રામજન્મભૂમિ મંદિરની પ્રાણ પ્રતિષ્ઠા પછી મોદીની આ પ્રથમ મુલાકાત હતી.
ત્રીજા રાઉન્ડની ચૂંટણીમાં સાત મેએ ગુજરાતની કુલ 26માંથી 25 બેઠકો પર મતદાન થશે, કારણ કે સુરતની બેઠક પર ભાજપના ઉમેદવારનો બિનહરીફ વિજય થયો છે. આ ઉપરાંત મહારાષ્ટ્રની 11, ઉત્તરપ્રદેશની 10, કર્ણાટકની બાકીની 14, છત્તીસગઢની સાત, મધ્યપ્રદેશની આઠ, બિહારની પાંચ, આસામ અને પશ્ચિમ બંગાળની ચાર-ચાર તથા ગોવાની તમામ બે બેઠકો પર મતદાન થશે. કેન્દ્રશાસિત પ્રદેશ દાદરા અને નગર હવેલી તથા દમણ અને દીવની 2 બેઠકોમાં પણ ત્રીજા તબક્કામાં મતદાન થશે.
